ចេញពីផ្សារត្រឡប់ទៅផ្ទះ ត្រូវរថយន្តបុកពីក្រោយស្លាប់យ៉ាងអណោចអធម នៅស្រុកកណ្តាលស្ទឹង
ខេត្តកណ្តាល៖ពិតជាសង្វែកខ្លាំងណាស់លោកតាវ័យជាង៧០ឆ្នាំម្នាក់ ត្រូវរថយន្តសិរីទំនើបដែលបើកបរដោយបុរសជនជាតិចិនបុកពីក្រោយ បណ្តាលឱ្យបោក្បាលហ្នឹងថ្នល់ស្លាប់ភ្លាមៗ នៅហ្នឹងកន្លែង នៅលើផ្លូវជាតិលេខ៣ ក្នុងភូមិសាស្ត្រស្រុកកណ្តាលស្ទឹង ។
នគរបាលចរាចរណ៍ផ្លូវគោកនៃអធិការដ្ឋាននគរបាលស្រុកកណ្តាលស្ទឹង បានឱ្យដឹងថា គ្រោះថ្នាក់ចរាចរណ៍ ដែលបណ្តាលឱ្យលោកតាម្នាក់ស្លាប់គួរឱ្យអាសូរនេះ បានកើតឡើងកាលពីវេលាម៉ោង១៣និង៣៥នាទីរសៀលថ្ងៃទី១៦ ខែមេសា ឆ្នាំ២០២៥ នៅលើកំណាត់ផ្លូវជាតិលេខ៣ ត្រង់ចន្លោះគីឡូម៉ែត្រលេខ២៨–២៩ ស្ថិតក្នុងភូមិព្រៃទទឺង ឃុំត្រពាំងវែង ស្រុកកណ្តាលស្ទឹងហើយជនរងគ្រោះដែលស្លាប់មានឈ្មោះ ប៉ិច ប៊ុនឡុក ភេទប្រុស អាយុ៧៦ឆ្នាំ មានទីលំនៅក្នុងភូមិត្រពាំងស្លា ឃុំព្រះនិពាន្វ ស្រុកគងពិសី ខេត្តកំពង់ស្ពឺ។
នគរបាលបញ្ជាក់ថា នៅមុនពេលកើតហេតុ លោកតារងគ្រោះ បានជិះម៉ូតូម៉ាកVIVA 110CC ពណ៌ខ្មៅ ពាក់ស្លាកលេខ ភ្នំពេញ 1E.6550 មួយគ្រឿង ម្នាក់ឯង ធ្វើដំណើរតាមបណ្តោយផ្លូវជាតិលេខ៣ ក្នុងទិសដៅពីត្បូងទៅជើង លុះមកដល់កន្លែងកើតហេតុ ក៏ត្រូវរថយន្តមួយគ្រឿងម៉ាក MASERATILEVANTE ពណ៌ ស ពាក់ស្លាកលេខ ភ្នំពេញ 2BY.1216 មួយគ្រឿង បើកបរដោយបុរសជនជាតិចិនម្នាក់ឈ្មោះ ZHU XIAOSONG អាយុ៣៩ឆ្នាំ ធ្វើដំណើរក្នុងទិសដៅស្របគ្នា មកបុកប៉ះពីក្រោយម៉ូតូរបស់លោកតារងគ្រោះ បណ្តាលឱ្យបោកក្បាលនិងអូសម៉ូតូជាច្រើនម៉ែត្រ ធ្វើឱ្យជនរងគ្រោះស្លាប់មួយរំពេចនៅលើដងផ្លូវ ។តាមការសន្និដ្ឋានគ្រោះថ្នាក់ចរាចរណ៍នេះ បណ្តាលមកពីភាគីរថយន្តបើកបរក្នុងល្បឿនលឿន ឯភាគីម៉ូតូបើកបរលើចំណែកផ្លូវល្បឿនលឿនរបស់រថយន្ត។ក្រោយកើតហេតុជនជាតិចិនខាងលើ ត្រូវបានសមត្ថកិច្ចឃាត់ខ្លួន បញ្ជូនទៅកាន់អធិការដ្ឋាននគរបាលស្រុកកណ្តាលស្ទឹង ។ចំណែកឯសពជនរងគ្រោះត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី និងនាំយកមធ្យោបាយទាំងរថយន្តនិងម៉ូតូយកទៅរក្សាទុកជាបណ្តោះអាសន្នរង់ចាំធ្វើការដោះស្រាយតាមច្បាប់៕
