ពិធីបុណ្យពុទ្ធាភិសេកព្រះពុទ្ធរូប ៥ព្រះអង្គ និងសម្ពោធឆ្លងសាលាពុទ្ធិកបឋមសិក្សាវត្ត រតនារាមផ្សារកណ្ដាល ក្នុងក្រុងប៉ោយប៉ែត
(ខេត្តបន្ទាយមានជ័យ)៖នៅព្រឹកថ្ងៃទី១៦ ខែមីនា ឆ្នាំ២០២៥ នៅវត្តរតនារាមផ្សារកណ្ដាល ស្ថិតនៅក្នុងសង្កាត់ផ្សារកណ្ដាល ក្រុងប៉ោយប៉ែត បានរៀបចំពិធីបុណ្យពុទ្ធាភិសេកព្រះពុទ្ធរូប ៥ព្រះអង្គ និងសម្ពោធឆ្លងសាលាពុទ្ធិកបឋមសិក្សា ក្រោមអធិបតីភាពដ៏ខ្ពង់ខ្ពស់ព្រះឧត្តមសីលញាណ ធុល សុធា ព្រះរាជាគណៈថ្នាក់កិត្តិយស និងជាព្រះមេគណខេត្ត , ព្រះធម្មវនវាសី ចន្ទ មុនី , លោក យឹម សំណាង អភិបាលរង ខេត្ត , លោក ញឹម ផឿង អភិបាលរង ក្រុង និងមានការនិមន្តនិងអញ្ជើញចូលរួមពីព្រះចៅអធិការវត្ត ជុំវិញក្រុង,ចៅសង្កាត់ ,កងកម្លាំងប្រដាប់អាវុធ រួមនឹងលោកតា លោកយាយ ប្រជាពលរដ្ឋជាច្រើនអង្គ/នាក់ផងដែរ។
ព្រះសិរីរក្ខិតវង្ស តែម ម៉ាច ព្រះរាជាគណៈថ្នាក់កិត្តិយស និងជាព្រះចៅអធិការវត្ត រតនារាមផ្សារកណ្តាល បានមានសង្ឃដីការថា ព្រះអង្គមន្តមកគង់នៅវត្តនេះរយៈពេល៤ឆ្នាំ ១១ខែ ខិតខំប្រឹងប្រែងទាំងកម្លាំងកាយ កម្លាំងចិត្តក្នុងការកសាងសមិទ្ធផលនានាដូចជា ដាក់ប្រព័ន្ធលូ ចាក់សាបក្នុងបរិវេណវត្ត ធ្វើសាលាឆាន់ កុដ្ឋ ខ្លោងទ្វារ របងវត្ត រូបបដិមាផ្សេងៗ ជាដើម បើគិតមកដល់បច្ចុប្បន្ននេះចំណាយទឹកប្រាក់សរុបចំនួនជិត ១ លានដុល្លារសហរដ្ឋអាមេរិក ហើយថវិកាទាំងអស់នេះបានមកពីសប្បុរសជននានា ដែលជាពុទ្ធបរិស័ទជិតឆ្ងាយទាំងក្នុងនិងក្រៅស្រុក ពិសេសក្រុងប៉ោយប៉ែត។ ជាក់ស្ដែងដូចជា ព្រះពុទ្ធរូប ៥ព្រះអង្គដែលកំពុងធ្វើបុណ្យពុទ្ធាភិសេកនេះចំណាយថវិកាអស់ចំនួន១២,៦០០០ដុល្លា ចំណែកមហាកុដិដែលមានកម្ពស់រហូត ៣ជាន់ ដែលកាត់ខ្សែបូណ៍សម្ពោធឆ្លងនេះក៏ចំណាយថវិកាអស់ចំនួន១៦ម៉ឺន ៥ពាន់ដុល្លារផងដែរ ។
ព្រះចៅអធិការវត្តបានមានសង្ឃដីកាបញ្ជាក់ថា ក្នុងមួយខែៗវត្តចំណាយទៅលើទឹក និងភ្លើងជិត ៣.០០០ដុល្លារឯណោះ ដោយចំណាយទៅលើភ្លើងក្នុងមួយខែមិនក្រោមពី ៩លានរៀល ។ចំណែកទឹកមិនក្រោម ៣លាន ៥០ម៉ឺនរៀលនោះឡើយ ហើយបច្ចុប្បន្នព្រះអង្គនៅជំពាក់គ្រឿងសំណង់គេចំនួន៣៦.៤០០ដុល្លារ ទៀត។ដូច្នេះព្រះអង្គសង្ឃឹមថាសប្បុរសជននានានិងនូវបន្តជួយបន្តបន្ទាប់ទៀត ។
ក្នុងឱកាសនោះព្រះធម្មវនវាសី ចន្ទ មុនី បានមានសង្ឃដីការកោតសរសើរដល់ព្រះចៅអធិការវត្ត រតនៈរាមផ្សារកណ្ដាល ដែលចាប់តាំងពីព្រះអង្គមកគង់ជាព្រះចៅអធិការវត្តនេះ ឃើញថា មានការរីកចម្រើនគួរឲ្យកត់សម្គាល់ និងបានផ្ដល់នូវឱវាទព្រះធម៌ អប់រំជាច្រើនដល់ពុទ្ធបរិស័ទ លោកយាយ លោកតា បងប្អូនប្រជាពលរដ្ឋចូលរួមផងដែរ។
ទន្ទឹមនោះព្រះធម្មវនវាសី ចន្ទ មុនី បានមានសង្ឃដីកាប្រគេនដល់ព្រះចៅអធិការវត្ត នៅពេលចូលកងវិញសិស្សមកពីក្រៅច្រើនគប្បីតែសហការជាមួយកម្លាំងសមត្ថកិច្ចជាពិសេសអធិការនគរបាលក្រុង កម្លាំងប៉ុស្តិ៍ ធ្វើការពិនិត្យសារធាតុញៀនសិន មុនឲ្យគង់នៅ បើមានត្រូវដោះស្រាយឲ្យហើយសិន កុំឱ្យមានរឿងក្តៅក្រហាយដល់វត្តអារាម ។ដោយមើលឃើញពីការខ្វះខាតជំពាក់គ្រឿងសំណង់គេផងនោះព្រះធម្មវនវាសី ចន្ទ មុនី បានប្រគេនបច្ច័យដល់វត្តរតនារាមផ្សារកណ្ដាលចំនួន ៨លានរៀល ។ជាចុងក្រោយ ព្រះធម្មវនវាសី ចន្ទ មុនី បានប្រគេន–ជូនប័ណ្ណថ្លែងអំណរអរគុណ រួចបន្តនិមន្តកាត់ឬសសីមា ជាកិច្ចបញ្ចប់កម្មវិធី៕
